İlham Əliyev Xocalıda | Seyidbəyli və Daşbulaq kəndlərində hansı işlər görülüb?

Prezident İlham Əliyev sentyabrın 15-də Xocalı rayonunun Seyidbəyli və Daşbulaq kəndlərində olub.

Seyidbəyli kəndində dövlət başçısına kəndin sosial infrastrukturunun bərpası barədə məlumat verilib.

Qeyd olunub ki, kənd 2023-cü ilin sentyabrında Silahlı Qüvvələrimizin həyata keçirdiyi antiterror əməliyyatı zamanı Azərbaycanın nəzarətinə keçib. Bərpa işləri çərçivəsində 30 kilometr uzunluğunda mövcud elektrik xətti bərpa olunub, transformator quraşdırılaraq, sayğaclaşdırma işlərinə start verilib.

Magistral qaz xətləri çəkilib, 5,7 kilometr uzunluğunda mövcud qaz xətti, həmçinin su anbarı, subartezian quyusu bərpa edilib, içməli su şəbəkəsi yenidən qurulub. Kənddə bayraq meydanı salınıb, kənddaxili yollar asfaltlanıb.

Seyidbəyli kəndində 140 ev var ki, onlardan da 22-i yararsız, 118-i isə qismən yararlıdır. Artıq 10 ev bərpa edilib. Bu ilin sonunadək 44, 2026-cı ildə isə daha 64 ev istismara hazır olacaq. İndiyədək kəndə 9 ailə (31 nəfər) köçüb. Dövlət başçısı həmçinin Daşbulaq kəndində 13 hektar sahədə salınmış tut bağında olub. İlham Əliyevə başçısına görülmüş işlər barədə məlumat verilib.

Bildirilib ki, burada Çin Xalq Respublikasından idxal olunmuş 130 min ting əkilib. Tut bağında damcılı suvarma sistemi yaradılıb.

Qeyd olunub ki, 2026-cı ildə 100 ton, 2030-cu ildə isə 500 ton tut yarpağının istehsalı planlaşdırılır. Proqnozlaşdırılan barama istehsalı gələn ildən başlayaraq 5 il ərzində 60 tondur. Bu ilin oktyabr-noyabr aylarında əlavə 150 hektar sahədə damcılı suvarma sisteminin tətbiqi və təxminən 1,5 milyon tut tinginin əkilməsi, klaster modeli əsasında tut bağının salınması, ətrafda kümxanaların qurulması, ipəkqurdunun bəslənməsi, yaş barama istehsalı, həmçinin məhsulun emal prosesinin həyata keçirilməsi nəzərdə tutulur.

Burada 25 nəfər daimi işlə təmin olunub. Mövsümi işlərə isə 750 nəfər cəlb ediləcək.