İlham Əliyev Xudafərin qəsəbəsinin təməlini qoyub

Prezident İlham Əliyev Xudafərin qəsəbəsinin təməlini qoyub.

Belə ki, dövlət başçısı mayın 4-də Cəbrayıl rayonunda Xudafərin qəsəbəsinin təməlinin qoyulması tədbirində iştirak edib.

Şərqi Zəngəzur iqtisadi rayonuna daxil olan Cəbrayıl, Qubadlı və Zəngilan rayonlarında Prezidentin xüsusi nümayəndəsi Vahid Hacıyev məlumat verib ki, qəsəbə yeni inşa olunan dəmir yolu xətti və avtomobil yolundan 7 kilometr məsafədə salınır. Qəsəbənin layihələndirilən ümumi ərazisi 24.9 hektardır.

Baş plana əsasən, 2042-ci ilədək burada 149 evin olması planlaşdırılır. Qəsəbədə birinci mərhələ üzrə 20 evin tikintisi nəzərdə tutulur. Bu yaşayış məntəqəsi 2, 3, 4 və 5 otaqlı fərdi yaşayış evlərindən ibarət olacaq. İlkin mərhələdə qəsəbəyə 77 nəfər köçürüləcək.

Qəsəbədə məktəb, uşaq bağçası, inzibati bina, məscid, bazar, çoxfunksiyalı bina (ticarət müəssisələri, tikinti materiallarının satış zonası, ictimai qida müəssisələri və s.), yaşayış evləri, mədəniyyət evi, “Karvansaray” hotel və icma evi inşa olunacaq.

Bundan başqa, Araz çayının sahilində və Xudafərin körpüsünün yaxınlığında park salınması da nəzərdə tutulub.