İlham Əliyev “Zəngilan” və “Şayıflı” SES-lərin açılışında iştirak etdi

Prezident İlham Əliyev mayın 18-də Zəngilan şəhərinin daxili yol-kommunikasiya şəbəkəsinin təməlini qoyub.

Zəngilan məscidinin isə açılışında iştirak edib. Bundan başqa, “Zəngilan” və “Şayıflı” Su Elektrik Stansiyalarının açılışlarında iştirak edən dövlət başçısına görülən işlər barədə məlumat verilib.

İşğaldan azad edilən ərazilərdə yaşıl enerji zonasının yaradılması, rayonların karbonsuz zonaya çevrilməsi ilə bağlı Prezident İlham Əliyevin tapşırığına uyğun olaraq “AzərEnerji” ASC tərəfindən Oxçuçayın Zəngilan rayonunun ərazisindən keçən hissəsində hər birinin gücü 10,5 meqavat olmaqla dörd yerdə ümumi gücü 42 meqavat olan “Zəngilan” Su Elektrik Stansiyaları silsiləsi layihələndirilərək qısa vaxt ərzində tikilib. “Sarıqışlaq” SES-də də işlər başa çatdırılıb.

Qeyd edək ki, Qarabağ və Şərqi Zəngəzur regionlarında iki yeni müəssisə – “Qarabağ Regional Elektrik Şəbəkəsi” MMC və “Yaşıl Enerji Elektrik Stansiyası” MMC yaradılıb.