İlham Əliyevdən Çin Sədrinə məktub

Prezident İlham Əliyev Çin Xalq Respublikasının Sədri Si Cinpinə təbrik məktubu ünvanlayıb.

Bu barədə Prezident Administrasiyası məlumat yayıb. Qarşıdan gələn Bahar bayramı münasibətilə Çin xalqını ürəkdən təbrik edən dövlət başçısı bildirib ki, Çin təqvimi ilə Yeni ilin gəlişini qeyd edən bu bayram minilliklərin sınağından çıxmış həyat fəlsəfəsinin dolğun təcəssümüdür.

“Təbiətə yeni görkəm və canlanma, insanlara yeni ruh gətirən bu bahar bayramının dost xalqınıza və ölkənizə xoş günlər, əmin-amanlıq və ruzi-bərəkət bəxş etməsini arzulayıram. Fürsətdən istifadə edərək Azərbaycanla Çin arasında dostluq və səmərəli əməkdaşlıq münasibətlərini bundan sonra da birgə səylərimizlə uğurla inkişaf etdirmək və genişləndirmək əzmində olduğumu bildirirəm”, - deyə təbrik məktubunda qeyd olunub.