İran-Ermənistan birliyinin Azərbaycan qorxusu

Ermənistanın İrandakı səfiri Azərbaycanı guya regional vəziyyəti gərginləşdirməkdə, genişmiqyaslı güc tətbiqi üçün zəmin hazırlamaqda ittiham edib.

Təbii ki, Arsen Avaqyanın bu açıqlaması İran-Ermənistan qardaşlığının, rəsmi Bakıya qarşı isə düşmən mövqeyinin növbəti təzahürüdür. Daha dəqiq desək, region üçün ən böyük təhlükə olan İrəvan-Tehran müttəfiqliyi vəziyyəti qəsdən gərginləşdirməyə çalışır.

Özünü qərbyönümlü adlandıran Ermənistan hakimiyyəti əslində İrandakı diktator molla rejiminin əsirinə çevrilib. Yəni vəziyyəti təkcə Ermənistan yox, həm də onun himaydarları gərginləşdirir. Bu şərtlər altında isə təbii ki, İran rejimindən istənilən təxribatı gözləmək olar. Çünki bu kimi davranışlar və yalnış siyasət rəsmi İrəvanın gərginliyi aktiv fazada saxlamasına rəvac verir.

Sirr deyil ki, Azərbaycanın yaratdığı yeni reallıq qorxusu İran-Ermənistan birliyini bir dam altında birləşməyə vadar edib. Amma əbəs yerə. Çünki qorxunun əcələ faydası yoxdur. Ona görə də həm Tehran, həm də İrəvan üçün bir yol var: qonşuluq münasibətlərində səmimi olmaq, sülh və sabitliyə töhfə vermək.