İran hərbi təyyarəsi Azərbaycan sərhədində

“Martın 11-i İrana məxsus hərbi təyyarə saat 09:44-dən 10:26-dək fasiləsiz olaraq Azərbaycan-İran dövlət sərhədi boyunca, Zəngilan rayonu istiqamətindən Biləsuvar rayonu istiqamətinə və geriyə doğru uçuş həyata keçirib”.

Bu barədə Müdafiə Nazirliyi və Xarici İşlər Nazirliyinin birgə yaydığı məlumatda bildirilib. Qeyd olunub ki, təyyarə iki ölkə arasında dövlət sərhədindən 3-5 km məsafədə, bəzi hallarda isə dövlət sərhədinin tam üstü ilə uçub.

Qurumların birgə məlumatında o da bildirilib ki, rəsmi Bakı İran tərəfini bu cür təhrikçi addımına görə şiddətlə qınayır, müvafiq izahat verməyə və gələcəkdə belə təxribatçı addımlardan çəkinməyə çağırır. Məsələ ilə bağlı martın 11-də İranın ölkəmizdəki səfiri Seyid Abbas Musəvi Xarici İşlər Nazirliyinə çağırılıb və ona müvafiq etiraz notası təqdim olunub.