İrandan hərbi dəstək: Ermənistan Rusiyadan başqa bütün ölkələrdən yardım istəyir

Ermənistan son aylarda ənənəvi təhlükəsizlik tərəfdaşı olan Rusiyadan başqa bütün tərəfdaşlarından təhlükəsizlik yardımı almağa başlayıb.

ABŞ-nin Müharibə Araşdırmaları İnstitutunun məlumatında bildirilir ki, rəsmi İrəvan və Tehran son vaxtlar Moskvadan narazılıqlarını ifadə edirlər: “İran Ermənistanı müdafiə etmək və bununla da onun Qafqazdakı strateji maraqlarını qorumaq üçün müxtəlif addımlar ata bilər”.

Məlumatda həmçinin İranın yenə Ermənistana hərbi dəstək verə biləcəyi qeyd olunur: “Bu, inandırıcıdır. İsrail mediası da İranın son aylarda Ermənistana Pilotsuz Uçuş Aparatları və digər texnikalar verdiyini iddia edir”.

Vurğulanıb ki, İran Ermənistan-Azərbaycan sərhədinə hərbi qüvvələr göndərə bilər.

“İran Silahlı Qüvvələrinin Baş Qərargah rəisi general-mayor Məhəmməd Baqiri oktyabrın 4-də Tehranda Ermənistan Təhlükəsizlik Şurasının katibi Armen Qriqoryanla görüşü zamanı sərhədə iranlı “müşahidəçilər” yerləşdirməyi təklif edib. Baqirinin mövqeyini nəzərə alsaq, bu müşahidəçilər, ehtimal ki, İran hərbi qulluqçuları olacaqlar”, – deyə məlumatda bildirilir.