İrəvan 4000 soydaşımızın taleyi barədə hələ də susur

Ermənistan hər iki Qarabağ müharibəsinin gedişində Azərbaycana qarşı çox sayda hərbi cinayətlər törədib.

Xüsusən də Birinci Qarabağ müharibəsi zamanı itkin düşən 4000-dək soydaşımızla bağlı bu ölkə hələ də məlumat verməyib və onların taleləri naməlum olaraq qalır. Yəni İrəvan bilərəkdən faktların ortaya çıxmasını istəmir. Çünki bu hal insan haqları və beynəlxalq hüququn norma və prinsipləri ilə tamamilə ziddiyyət təşkil edir.

Bütün İnsanların Məcburi İtkin Düşmədən Qorunması Haqqında konvensiyanın 1-ci maddəsi məcburi itkin düşməni qadağan edir və bu fakt heç bir halda bəraət kimi qəbul edilmir. Məcburi itkin düşmənin geniş yayılan 6-cı maddəsi isə insanlığa qarşı cinayət kimi müəyyən edilir. Ermənistan əsirlərə qarşı qeyri-insani münasibət göstərməklə, onların Vətənə qayıdışına əngəl törətməklə bu maddələri kobud şəkildə pozub və birbaşa cinayət məsuliyyəti daşıyır.

Qeyd edək ki, itkin düşən şəxslərə görə cəzalandırma ilə bağlı beynəlxalq presedentlər mövcuddur. Buna misal olaraq, Srebrenitsa qətliamlarını misal göstərmək olar. Çünki bu cinayətləri törədənlər beynəlxalq tribunala çıxarılıb və ömürlük həbs cəzasına məhkum ediliblər. Ermənistanın Azərbaycana qarşı törətdiyi insanlıq əleyhinə cinayətlər də bundan fərqlənmədiyi üçün analoji cəzanın bu ölkənin əliqanlı cəlladlarına da tətbiq olunmasına əsas verir.