İrəvan Bakının təklifini qəbul etmədi

Xarici işlər naziri Ceyhun Bayramov Laçın yolunun başlanğıcında sərhəd nəzarət-keçid məntəqəsinin qurulması ilə bağlı Azərbaycanın təklifini qəbul etməməklə bağlı erməni həmkarı Ararat Mirzoyanın açıqlamasını şərh edib.

Nazir jurnalistlərə açıqlamasında bildirib ki, bu məntəqələr yaradılsa, hər kəs görər ki, Laçın yolunda hərəkət üçtərəfli bəyanatın tələblərinə uyğun baş verir.

“Bizim çoxsaylı beynəlxalq tərəfdaşlarla olan işçi müzakirələrimiz zamanı da bu təklif sağlam və konstruktiv təklif kimi qəbul edilib. Ancaq əfsus ki, Münhendə Ermənistan tərəfindən buna cavab verilmədi. Üstündən iki gün keçəndən sonra Ermənistan xarici işlər naziri bu təklifin onlar üçün məqbul olmaması barədə açıqlama verdi. Bizə görə bunun bir neçə göstəricisi var. Birincisi odur ki, Ermənistan yoldan sui-istifadə hallarının davam etməsində maraqlıdır. İkinci məqam ondan ibarətdir ki, Ermənistanın yanaşmasında böyük ziddiyyətlər var. Bir tərəfdən Ermənistan bütün beynəlxalq platformalarda bu istiqaməti gündəmə gətirib Azərbaycana təzyiq etmək istəyir, digər tərəfdən isə konstruktiv dialoq təklif olunan zaman bundan əsassız şəkildə yayınır”, - deyə C.Bayramov qeyd edib.