İşğalla bağlı qalmaqallı etiraf | “Ermənistanın əsl niyyəti bu idi ki...”

Rusiya xarici işlər naziri Sergey Lavrov İrəvanda erməni jurnalistin sualına cavab olaraq Ermənistanın uzun illər boyu Azərbaycan ərazilərini məhz Rusiya silahı ilə işğal etdiyini etiraf edib.

S.Lavrov bu fikirləri Qarabağ müharibəsində Azərbaycanın Rusiya istehsalı silahlardan istifadə etməsi ilə bağlı irəli sürülən ittihamlara cavab olaraq səsləndirib.

“Azərbaycanın Rusiya silahı istifadə etməsinə gəlincə, xatırladım ki, Ermənistan da müstəqillik əldə etdikdən sonrakı bütün illər ərzində Rusiya silahından istifadə edib. O cümlədən 7 rayonun işğalı üçün də”, – deyə S.Lavrov vurğulayıb.

O əlavə edib ki, Ermənistan həmin ərazilərdə uzunmüddətli mövqe tutmaq üçün ciddi istehkamlar qurub və bəzi ekspertlərin fikrincə, bu müdafiə sistemlərinin xarakteri o torpaqların heç vaxt geri qaytarılmayacağı niyyətini göstərirdi.

S.Lavrov Ermənistan rəhbərliyinin heç vaxt “Dağlıq Qarabağ”ı müstəqil dövlət kimi tanımaq təşəbbüsü göstərmədiyini də xüsusi olaraq qeyd edib.

“Rusiya silahı dünyanın bir çox ölkələrində var. Məsələn, Mozambik bayrağında da “Kalaşnikov” avtomatı əks olunub. Amma bu, həmin silahların hər yerdə bizim istədiyimiz məqsədlə istifadə olunduğu anlamına gəlmir”, – deyə o əlavə edib.