İsrail və İran xalqa göstərmək istəyirdi ki... | İsfahandakı partlayışın əsl səbəbi

“ABŞ deyir ki, İsrail İrana hücum etməsi ilə bağlı ona məlumat verib, amma özü bu hücumda iştirak etmir. İsrail isə məhdud miqyasda İrana zərbə endirdiyini bildirir”.

Bunu yerli mediaya açıqlamasında politoloq Zərdüşt Əlizadə deyib.

O, hazırda tərəflər arasında informasiya müharibəsi getdiyini bildirib:

“İran isə əvvəl demişdi ki, hücum etsək, İsrail cavab zərbəsi endirəcək. Amma indi deyirlər ki, İrana heç bir zərbə olmayıb. İsfahan yaxınlığında yerləşən gurultunun səbəbi isə o idi ki, hava hücumundan müdafiə sistemləri səmada hansısa bir obyekti görüb və ona atəş açıblar.

Yəni İran və İsrail öz əhalisinə göstərmək istəyir ki, guya bunlar bir-birinə cavab atəşi açıblar. Çox güman ki, tərəflər öz xalqına və dünya ictimaiyyətinə mövqeyini nümayiş etdirirlər. Hərə özünün qələbəsini təqdim edir. Dəfələrlə görmüşəm ki, hansısa dövlət məğlub olanda bunu özünün qələbəsi kimi təqdim edib”.

Xatırladaq ki, dünya mediasında İsrailin İrana raket zərbəsi endirdiyi barədə məlumat yayılıb. Kəhcəvaristan şəhərində partlayış olduğu bildirilir. Sözügedən şəhərin yaxınlığında isə hava limanı və İran Hərbi Hava Qüvvələrinin bazası yerləşir.