Korotçenko dövlət başçılarının görüşünü şərh etdi | Laçın Qafqazın İsveçrəsi hesab edilə bilər

Rusiya Prezidenti Vladimir Putinin qısa zaman öncə Azərbaycana rəsmi səfəri, onun ardınca isə oktyabrın 8-də Moskvada Müstəqil Dövlətlər Birliyi Dövlət Başçıları Şurasının iclasında Azərbaycanın Laçın şəhərinin 2025-ci ildə MDB-nin mədəniyyət paytaxtı seçilməsi Rusiyanın dövlətimizə qarşı xüsusi diqqətindən xəbər verir.

Azərbaycan və Rusiya dövlət başçılarının görüşünü şərh edən rusiyalı politoloq İqor Korotçenko bildirib ki, görüş zamanı Vladimir Putin Azərbaycan Prezidenti İlham Əliyevlə söhbətinə xüsusi diqqət ayırıb:

“Laçın uzun illər Ermənistanın işğalı altında olub. Geri qaytarıldıqdan sonra şəhərin dirçəlməsi üçün böyük işlər görülüb. Mən orada olub gözəlliklərin şahidi olmuşam. Demək olar ki, ekoloji xüsusiyyətlərin unikal birləşməsinə görə Laçın Qafqazın İsveçrəsi hesab edilə bilər. Bu gün Ermənistanın da razılığı ilə Laçının mədəniyyət paytaxtı statusu alması Azərbaycanın diplomatik qələbəsindən xəbər verir.

Azərbaycanın ədalətli mövqeyi Rusiya Federasiyası tərəfindən tam dəstəklənir və Moskva Azərbaycanla Ermənistan arasında sülh müqaviləsinin imzalanmasının ən qısa zamanda baş tutması üçün hər şeyi edəcək. Bu, xüsusilə erməni lobbilərinin dəstəyi ilə Qərb dövlətlərinin Azərbaycanı qaralamaq cəhdləri fonunda vacibdir.

Bütövlükdə iki ölkənin liderləri arasında keçirilən görüşün nəticələri onu göstərir ki, əlaqələr bütün sahələrdə uğurla inkişaf edir. Bu münasibət digər ölkələr üçün bir nümunə olmalıdır. İlham Əliyevin Moskvaya gəlişi, sammitdə iştirakı və Vladimir Putinlə görüşü Azərbaycanın onlarla dövlətin bu gün ayaqlaşmağa çalışdığı məsuliyyətli, hörmətli bir ölkə olduğunu nümayiş etdirdi”.

İqor Korotçenko əlavə edib ki, Ermənistan rəhbərliyinin Azərbaycanın COP29 sammitindən guya Ermənistana hücuma hazırlıq məqsədilə “tüstü pərdəsi” kimi istifadə etdiyini iddia edərək Bakıya səfər etməkdən çəkinməyə çağıran yalan dolu təbliğatı təəssüf doğurur.