Lavrov Mirzoyanla mətbuat konfransında mühüm xatırlatma etdi

“Rusiya Ermənistan-Azərbaycan münasibətlərinin normallaşması məsələsində heç kəsin tərəfini tutmur”.

Bu barədə Rusiya xarici işlər naziri Sergey Lavrov erməni həmkarı Ararat Mirzoyanla danışıqlarının yekunlarına dair birgə mətbuat konfransında bildirib.

“Mən başa düşə bilmirəm ki, nəyin əsasında siz Rusiyanın mövqeyinin Azərbaycanla üst-üstə düşdüyü nəticəsinə gəlmisiniz? Sizin sualınızdan belə çıxır ki, Ermənistan-Azərbaycan münasibətlərinin normallaşması məsələsində biz bir tərəfi tuturuq. Bu belə deyil.

Biz İrəvan-Bakı münasibətlərinin normallaşması məsələsi ilə məşğul oluruq, həmçinin qardaş xalqlarımızın sülh və mehriban qonşuluq şəraitində yaşamasında dərindən maraqlıyıq. Bizim həm Azərbaycanla, həm də Ermənistanla strateji tərəfdaşlıq və müttəfiqlik münasibətlərimiz mövcuddur.

Cənubi Qafqazdan uzaqda yerləşən ölkələrdən fərqli olaraq bunda şəxsən maraqlıyıq. Həmin ölkələr regionda gərginliyi daha uzun müddətə saxlamaq üçün gündəlikləri irəli çəkirlər. Ümid edirlər ki, bu gərginliklər çərçivəsində onlar öz geosiyasi maraqlarını daha intensiv şəkildə irəli apara biləcəklər. Rusiya İrəvan və Bakının razılığı ilə əldə olunan razılaşmaları rəhbər tutaraq hərəkət edir”, – deyə Sergey Lavrov vurğulayıb.