Liderlərin müraciətləri səsləndirildi | Ərdoğanın mesajında diqqətçəkən məqam - Baku TV

Birinci Türkoloji Qurultayın 100 illiyinə həsr olunan “Türk Dünyası Həftəsi”nə start verilib.

Heydər Əliyev Mərkəzində “Türk Dünyası Həftəsi”nin rəsmi açılış mərasimi keçirilib.

20 ölkədən gələn türk alimləri və türkoloqlar əvvəlcə xatirə fotosu çəkdirib, daha sonra Qurultaya həsr olunan sərgi və qısametrajlı filmi izləyiblər.

Açılış mərasimində Azərbaycan Prezidenti İlham Əliyevin, həmçinin Qırğızıstan, Qazaxıstan, Türkiyə və Özbəkistan liderlərinin iştirakçılara ünvanladıqları müraciətlər səsləndirilib.

Türkiyə Prezidenti Rəcəb Tayyib Ərdoğan müraciətində Türkoloji Qurultayın 100 illiyinin məhz Bakıda keçirilməsinin rəmzi əhəmiyyət daşıdığını vurğulayaraq Azərbaycanın Türk dünyasının birliyinə və əməkdaşlığının güclənməsinə mühüm töhfələr verdiyini bildirib.

O, ortaq dil, tarix və mədəniyyət məsələlərinin 100 il sonra da aktuallığını qoruduğunu qeyd edib.

Rəsmi hissədən sonra iştirakçılar panel müzakirələrinə qatılıblar. Burada türk dövlətləri arasında əməkdaşlığın inkişaf perspektivləri müzakirə olunub.

“Türk Dünyası Həftəsi” iyulun 3-dək davam edəcək. Proqram çərçivəsində qonaqların Şuşa, Ağdam və Xankəndiyə səfəri, həmin şəhərlərdəki tarixi və mədəni abidələrlə tanışlığı da nəzərdə tutulub.