Makron yeni terror üçün çalışır | Zaxarova od püskürdü

“Moskva və Kollektiv Təhlükəsizlik Müqaviləsi Təşkilatının regionda vəziyyətin gərginləşməsi zamanı Ermənistana kömək etməməsi ilə bağlı bəyanatlar yalandır”.

Bunu Rusiya Xarici İşlər Nazirliyinin sözçüsü Mariya Zaxarova yerli mediaya müsahibəsində deyib.

O bildirib ki, İrəvan Qarabağla bağlı qərarlarını NATO-nun təsiri altında verib. Rəsmi İrəvan bu qərarı Qərblə məsləhətləşmələrdən sonra açıqlayıb.

Bu arada Mariya Zaxarova Fransa lideri Emmanuel Makronun Ukraynanı silahlandırması mövzusuna da toxunub. Bildirib ki, E.Makron Rusiya ilə antiterror əməkdaşlığını gücləndirmək niyyətində olduğunu dəfələrlə bəyan etməsinə baxmayaraq, Kiyevi yeni terror aktları törətmək üçün vasitələrlə təmin etməkdə davam edir.

“Əgər bir şəxs deyirsə ki, terrorla mübarizə aparmaq lazımdır, necə ola bilər ki, sabah bu şəxs Kiyevə hərbi yardım göndərilməsini elan edir?”, – deyə nazirlik sözçüsü vurğulayıb.

M.Zaxarova onu da əlavə edib ki, E.Makron yarım gündən bir fikrini dəyişir. Buna görə də onun nə dediyini yaxın çevrəsində kimsə anlaya bilmir.