Millət vəkilindən sərt cavab: Bu, Avropa Parlamentinin biabırçılığıdır

“Avropa Parlamentinin qəbul etdiyi qərəzli qətnamə anti-Azərbaycan məqsədi daşıyaraq ədalətə zidd sənəddir”.

Bunu Milli Məclisin deputatı Aydın Mirzəzadə parlamentin oktyabrın 6-da keçirilən plenar iclasında Avropa Parlamentinin ötən gün qəbul etdiyi qərəzli qətnaməyə münasibət bildirərkən deyib.

Onun sözlərinə görə, bu qətnamə ölkəmizin ərazi bütövlüyünü şübhə altına alır: “Bu sənəd həm də Avropa Parlamentinin nüfuzuna xələl gətirən qətnamə kimi qiymətləndirilə bilər. Belə başa düşülür ki, Avropa Parlamentində nə kompüter, nə internet, nə də hansısa məlumatı əldə etməyə vasitə var”.

“Separatçı rejim Qarabağ bölgəsində olan sakinləri təkidlə oradan çıxarmaq çağırışları edir. Orada olan əhaliyə bizim hərbçilərin, hüquq-mühafizə orqanlarının diqqətini hər kəs görür.

Halbuki bu diqqəti nə Xocalı hadisələrində, nə də sonrakı hadisələrdə gördük. Avropa Parlamenti nədənsə Ermənistanın Azərbaycan torpaqlarına olan iddiasına, Xocalı faciəsinə, ərazilərimizin işğalına, bir milyona yaxın vətəndaşımızın ata-baba yurdlarından məcburi çıxarılmasına göz yumdu. Bu gün isə Ermənistanın işğalçılıq siyasətinə müdaxilə etmir”, – deputat söyləyib.