Moskvanın hədəsindən sonra Azərbaycan NATO üçün daha da önəmli oldu

“Azərbaycan NATO üçün əhəmiyyətli ölkədir”.

Bu barədə Alyansın Baş katibi Yens Stoltenberq Azərbaycan Dövlət İnformasiya Agentliyinə müsahibəsi zamanı deyib.

O, açıqlamalarında rəsmi Bakının Ukraynaya etdiyi humanitar yardımı da yüksək qiymətləndirib:

“Azərbaycan NATO üçün enerji təhlükəsizliyi baxımından son dərəcə əhəmiyyətli ölkədir. Xüsusilə irimiqyaslı Rusiya-Ukrayna müharibəsi zamanı rəsmi Moskva NATO müttəfiqlərinə hədə-qorxu gələ bilmək üçün təbii qazdan manipulyasiya aləti kimi istifadə etməyə başlayandan sonra bu, bizim üçün daha da vacib oldu.

Azərbaycan tərəfindən miqdarı artırılan qaz tədarükü NATO müttəfiqlərinin qaz təminatçısı kimi Rusiya asılılığından azad olmasına imkan yaradıb. Yalnız təbii qaz deyil, həmçinin elektrik kabelləri vasitəsilə enerji ixracı sahəsində atılan addımları da yüksək qiymətləndirirəm.

Ümumiyyətlə, Qafqazda bizim bir neçə vacib tərəfdaşlarımız var, buna görə də bu region NATO üçün çox vacibdir. Bundan əlavə, Azərbaycanın Ukraynaya göndərdiyi humanitar yardımı və minaların təmizlənməsi sahəsində dəstəyini yüksək qiymətləndirirəm”.

Məlumat üçün bildirək ki, NATO Baş katibi Cənubi Qafqaza 3 günlük səfəri çərçivəsində martın 17-18-də Bakıda yüksəksəviyyəli görüşlər keçirib. Martın 19-da isə Yens Stoltenberq Ermənistana səfər edib. Bildirilib ki, o, 1 günlük səfəri çərçivəsində ölkənin Baş naziri Nikol Paşinyan və Prezident Vaaqn Xaçaturyanla görüşlər keçirəcək.