MSK-nın sədr müavinindən bələdiyyə seçkiləri ilə bağlı açıqlama

Azərbaycanda növbəti bələdiyyə seçkilərinin keçiriləcəyi tarix noyabrın sonunadək elan olunacaq.

Bu barədə “Report”a açıqlamasında Mərkəzi Seçki Komissiyasının sədr müavini Rövzət Qasımov məlumat verib.

Sədr müavini qeyd edib ki, Seçki Məcəlləsinin tələblərinə əsasən, bələdiyyə seçkiləri Mərkəzi Seçki Komissiyası tərəfindən təyin edilir.

“Bununla əlaqədar müvafiq qərar səsvermə gününə azı 60 gün qalmış rəsmi qəzetdə dərc olunur. Kollegial orqan kimi Mərkəzi Seçki Komissiyasında aparılan müzakirələrdən sonra bələdiyyə seçkilərinin qanunvericiliyin tələblərinə uyğun qaydada bu il noyabrın sonunadək elan olunması qənaətinə gəlinib”, – deyə Rövzət Qasımov bildirib.

Qeyd edək ki, digər seçkilərdən fərqli olaraq bələdiyyə seçkilərini Mərkəzi Seçki Komissiyası elan edir. Bu seçkilər hər 5 ildən bir dekabrın 23-də keçirilir. Sonuncu bələdiyyə seçkiləri 2019-cu ildə keçirilib.