Münxen görüşündə müəmma | Azərbaycandan Ermənistana son şans

Şərti sərhəddə baş verən son toqquşmalar Azərbaycanla Ermənistan arasındakı etimad mühitinə zərər verməklə yanaşı, sülh danışıqlarının da ləngiməsinə səbəb olur.

Sanki rəsmi İrəvan məqsədli şəkildə silaha əl ataraq sülh prosesinə əngəl olmaq istəyir. Ancaq rəsmi Bakı hər zaman olduğu kimi, yenə də səbir nümayiş etdirir.

Məsələn, fevralın 24-də Ermənistan Silahlı Qüvvələrinin növbəti təxribatına qarşı Ordumuz təmkinlə davrandı. Bununla da Ermənistanın vəziyyəti növbəti dəfə gərginləşdirmək niyyəti puça çıxdı. Azərbaycanın bu addımı həm də Münxen Təhlükəsizlik Konfransında əldə olunan razılaşmalara sadiqliyinin göstəricisidir.

Məsələ ilə bağlı Baku TV-yə danışan politoloq Zaur İbrahimli bildirib ki, bu 3 il ərzində Ermənistan müxtəlif bəhanələrlə sülh prosesini yubadır:

“Ermənistanın aşkar strategiyası budur ki, ermənilər üçün daha əlverişli xarici mühit yaranacaq, eyni zamanda xarici təzyiqlər Azərbaycanı güzəştlərə vadar edəcək və bu, ermənilərin mövqelərini möhkəmləndirəcək. Lakin sonuncu Münxen danışıqları da göstərdi ki, ermənilərin ümidləri əbəsdir. Çünki Azərbaycanın sülh gündəliyi qəbul olundu və Azərbaycan diplomatiyası növbəti uğur əldə etdi”.

Azərbaycan vədinə sadiqdir və bölgədə vəziyyətin yenidən alovlanmasını istəmir. Digər tərəfdən rəsmi Bakı üçün münaqişə artıq 3 ildir ki, bitib. Ancaq hələ də regionda maraqlı qüvvələr var. Baxmayaraq ki, rəsmi Bakı üçün üçüncü tərəflərin müdaxiləsi qəbuledilməzdir, Ermənistan hələ də Fransanın bölgədə çaldığı havaya oynayır.