Onlar bizim şərəfimizi və ləyaqətimizi əlimizdən alıblar | Sen Martinlilərin etiraz səbəbi

“Biz uzun illərdir ki, kolonializm şəraitində yaşayırıq. Buna görə də ya holland, ya da ki, fransız kimliyi altında yaşamağa məcbur edilmişik”.

Bu sözləri jurnalistlərə açıqlamasında “Nation Opportunity Wealth” (NOW) siyasi partiyasının lideri Kristofer Emanuel deyib.

“Onlar bizim şərəfimizi, ləyaqətimizi və mədəniyyətimizi əlimizdən alıblar. Şəxsi kimliyimizin olmaması səbəbindən mən həm fransız, həm də holland pasportumla buraya gəlmişəm. Lakin bu mənim üçün heç bir məna ifadə etmir. Çünki mən Sen Martindənəm. Onu da qeyd edim ki, biz sadəcə öz səsimizi dünyaya çatdırmaq niyyətindəyik.

Sen Martinlilərin dərdi Fransa və yaxud da Niderland ilə müharibəyə girmək deyil. Anam, hətta nənəm azadlığımız üçün dayanmadan mübarizə aparıblar. Azərbaycana gəldikdə isə siz yeganə ölkəsiniz ki, bizi bu qədər dəstəkləyirsiniz. Azərbaycan bizi dinləyən, problemlərimizi dünya dövlətləri qarşısında səsləndirən tək ölkədir. Siz bizi hər zaman dəstəkləmisiniz və mən buna görə dərindən minnətdaram”, – deyə deputat bildirib.