“Onlar mənim yaxşı dostlarımdır” | Tramp Azərbaycan və Ermənistan liderlərindən yazdı

"Azərbaycan Prezidenti İlham Əliyev və Ermənistan Baş naziri Nikol Paşinyan mənim yaxşı dostlarımdır".

Bu barədə ABŞ Prezidenti Donald Tramp "Truth Social" sosial şəbəkəsində yazıb.

"Onillərlə davam edən müharibə və insan ölümündən sonra sülh müqaviləsi imzalayarkən Azərbaycan Prezidenti İlham Əliyev və Ermənistan Baş naziri Nikol Paşinyanla birlikdə olmaq mənim üçün böyük şərəf idi. Onlar həm möhtəşəm insanlar, həm də böyük liderlərdir. İndi onlar mənim yaxşı dostlarımdır!", – paylaşımda deyilir.

Xatırladaq ki, Azərbaycan Prezidenti İlham Əliyev avqustun 7-8-də ABŞ-də işgüzar səfərdə olub. Səfər çərçivəsində Azərbaycanın, eləcə də Cənubi Qafqazın gələcəyi üçün önəmli qərarlar qəbul olunub. Bunlara ABŞ, Azərbaycan, Ermənistan liderlərinin Vaşinqton şəhərində keçirilmiş görüşünə dair Birgə Bəyannaməni, Azərbaycan Respublikası ilə Amerika Birləşmiş Ştatları arasında Strateji Tərəfdaşlıq Xartiyasının hazırlanması məqsədilə Strateji İşçi Qrupunun yaradılması haqqında Anlaşma Memorandumunu, eləcə də Ermənistanla Azərbaycan arasında sülh müqaviləsinin paraflanmasını göstərmək olar.