Oyunu və siyasəti bir-birinə qatan Fransadan Azərbaycana qarşı riyakar addım

Yay Olimpiya Oyunları dünyada ən mötəbər idman yarışı kimi xarakterizə edilsə də, Paris-2024-ün timsalında idmandan daha çox siyasi məqamlarla xatırlanmağa başlayıb.

Söhbət ondan gedir ki, Qərbdə görməyə öyrəşdiyimiz ikili standartlar bu gün Olimpiya Oyunlarına da sirayət edib.

Belə ki, iyulun 29-da Parisdə fəxri kürsünün ən yüksək pilləsinə qalxmağa haqq qazanan cüdoçumuz Hidayət Heydərova Azərbaycan bayrağı ilə sevinməyə icazə verilmədiyinə canlı yayım zamanı hər birimiz şahid olduq.

Bu isə Parisdə ilk belə hal deyil. Bundan əvvəl Qazaxıstan komandasının təmsilçisinə qarşı da eyni addım atılıb və idmançının qələbə sevincini bayrağı ilə qeyd etməsi məqbul hesab edilməyib.

Amma maraqlıdır ki, digər ölkələrin təmsilçilərinə belə qadağa qoyulmayıb. Məsələn, ABŞ və Yaponiya komandalarının idmançılarının Olimpiya Oyunlarında qələbəni öz ölkələrinin bayraqları ilə qeyd etmələrinə dair çoxlu görüntülər var.

Beləliklə, Paris Yay Olimpiya Oyunlarının siyasiləşdirilməsi, siyasi maraqların ön plana çıxarılması və təbii ki, ikili standartlar məsələsi ön plana çıxır.

Necə olur ki, ABŞ və Yaponiya idmançılarına aid olan hüquqlar müsəlman, türk ölkəsi olan Azərbaycan və Qazaxıstana şamil edilmir?