Paris-Bakı münasibətləri bərpa olunur | Yeni mərhələ başlayır

Azərbaycan və Fransa arasında bir müddət davam edən diplomatik gərginlik başa çatır. Prezident İlham Əliyev Fransanın Azərbaycandakı yeni fövqəladə və səlahiyyətli səfiri Sofi Laqutun etimadnaməsini qəbul edərkən mühüm bəyanatla çıxış edib. Dövlət başçısı Fransa Prezidenti Emmanuel Makronla Kopenhagendə keçirilən görüşdən sonra bütün anlaşılmazlıqların aradan qaldırıldığını və əlaqələrdə yeni bir mərhələnin başladığını vurğulayıb. Bakı və Paris yüksək texnologiyalar, aerokosmik sahə, mədəniyyət və humanitar əlaqələr daxil olmaqla, iqtisadi və siyasi əməkdaşlığı bərpa etməyə hazırlaşır. Həmçinin, Hökumətlərarası Komissiyanın fəaliyyətinin bərpası iki ölkə arasındakı strateji tərəfdaşlığın güclənməsinə xidmət edəcək. Bu addım Fransanın Cənubi Qafqaz regionunda balanslı və konstruktiv siyasətə keçidini göstərir.