Paşinyan 4 kəndlə bağlı gözlənilməz açıqlama | Kəndlərimiz geri qaytarır?

“Qısa müddət ərzində dörd kənd Azərbaycana qaytarılmalıdır”.

Ermənistan mediasının məlumatına görə, bunu ölkənin Baş naziri Nikol Paşinyan parlamentdə qapalı iclasda çıxış edərkən deyib.

Məqalədə qeyd olunub ki, martın 22-si axşam Baş nazir Nikol Paşinyan Milli Assambleyada "Mülki müqavilə" fraksiyasının deputatları ilə növbəti qapalı iclas keçirib. Tədbirdə, demək olar ki, bütün hökumət üzvləri, hətta Silahlı Qüvvələrin Baş Qərargah rəisi Edvard Asryan da iştirak edib. Görüş iki saata yaxın davam edib və gərgin atmosferdə keçib.

Məlumata görə, Nikol Paşinyan açıq şəkildə qeyd edib ki, qısa müddət ərzində dörd kəndin Azərbaycana qaytarılması baş tutmalıdır.

“O, yaxın günlərdə üçüncü ordu korpusunun bu ərazilərdən çıxarıla biləcəyinə və N.Paşinyanın dediyi kimi, Azərbaycanın olan dörd yaşayış məntəqəsinin sahiblərinə qaytarıla biləcəyinə eyham vurub”, – deyə məqalədə vurğulanıb.

Qeyd edək ki, son vaxtlar İrəvanda ən yüksək dairələrdə kəndlərin Azərbaycana qaytarılması mövzusu çox aktuallaşıb və bu, faktiki olaraq Ermənistanın Azərbaycanın Cənubi Qafqazda yaratdığı yeni reallıqları qəbul etdiyini və sülh prosesini sürətləndirmək üçün konstruktiv addımların zəruri olduğunu anladığını göstərir.