Paşinyan məğlubiyyətə görə ordunu günahlandırdı

“Ermənistan tərəfi danışıqlar zamanı Qarabağın Azərbaycanın tərkibində olması variantını nəzərdən keçirsəydi, 44 günlük müharibənin qarşısını almaq olardı”.

Bunu Ermənistanın Baş naziri Nikol Paşinyan iyunun 27-si ölkə parlamentində 44 günlük müharibənin araşdırılması üzrə istintaq komissiyasının növbəti iclasında bildirib.

“Danışıqlar prosesində bir neçə fikir ayrılığı var idi ki, onlar bu və ya digər şəkildə hərbi əməliyyatların bərpası üçün səbəb ola bilərdi. Söhbət Laçın yolundan, Azərbaycan-Ermənistan dövlət sərhədinin delimitasiyası və demarkasiyasından, eləcə də məcburi köçkünlərin geri qaytarılması məsələsindən gedir" , – deyə Baş nazir qeyd edib.

44 günlük müharibədəki məğlubiyyətə görə ordunu günahlandıran N.Paşinyan qeyd edib ki, erməni hərbçilər çevriliş etmək istəyirdilər. O əlavə edib ki, 1994-cü ildə atəşkəs elan olunandan sonra Azərbaycan əhalisi 2 dəfə artıb, Ermənistan əhalisi isə xeyli azalıb.

“1994-cü ildə atəşkəs elan olunan zaman qeyd olundu ki, Ermənistan tərəfi müharibədə qalib gəlib, Azərbaycan tərəfi isə məğlub olub. Bəs niyə bu qələbə nəticəsində Ermənistanın əhalisi artmadı, əksinə azaldı və Azərbaycanı iqtisadiyyat sahəsində rəqabətdə məğlub etmək mümkün olmadı? Bu, təhlükəsizliyin təmin olunması və hərbi büdcə ilə bağlıdır”, – deyə Baş nazir vurğulayıb.