Paşinyan mübahisəli məsələlərin Vaşinqton bəyannaməsində yer aldığını bildirib

“Bizim təsəvvürümüzdə Şərqdən Qərbə dəmir yolu Azərbaycandan Meğriyə, sonra Naxçıvana, ardınca isə Arazdəyəndən Türkiyə ilə sərhəddəki Axurik kəndinə istiqamətlənməlidir”.

Bunu Ermənistanın Baş naziri Nikol Paşinyan “Sülh qovşağı: regional kommunikasiyaların inkişafı” konfransında deyib.

Onun sözlərinə görə, Ermənistan dəmiryol xəttinin bərpası işlərinə start verib və kiçik bir hissə qalıb.

N.Paşinyan bildirib ki, Azərbaycan artıq Qars-Dilucu dəmir yolunun inşasına başlayıb.

“Əlbəttə ki, Ermənistanla Azərbaycan arasında sülh prosesi son vaxtlar nikbin xətlə inkişaf edirdi, amma müəyyən çətinliklər var idi. Bizim razılıq əldə etməyimizdə həlledici faktor ABŞ Prezidenti Donald Trampın görüşdə iştirakı olub”, – deyə N.Paşinyan bildirib.

O deyib ki, İrəvan 2025-ci ilin sonuna qədər hüquqi məsələləri yekunlaşdırmaq istəyir. 2026-cı ilin ilk yarısında qərar verilməli və sonrakı 6 ayda tikinti işləri başlamalıdır.

Ermənistanın Baş naziri qeyd edib ki, layihənin reallaşdırılmasına heç nə mane olmur. Çünki bütün mübahisəli məsələlər Vaşinqton bəyannaməsində yer alıb.