Paşinyan Münxen görüşündə oyuna əl atmaq istədi

Vətən müharibəsindən sonra Azərbaycan və Ermənistan arasında müxtəlif platformalarda sülh müqaviləsinin detalları müzakirə olunub, vəziyyətin normallaşdırılmasına cəhdlər edilsə də, İrəvanın ikibaşlı siyasət sindromu və kənar qüvvələrin bu ölkəyə təzyiqləri konkret addımların atılmasına mane olub.

Nikol Paşinyan bu dəfə də ənənəsinə sadiq qalaraq analoji addım atıb. Belə ki, bir neçə gün bundan əvvəl Azərbaycanı Praqa və Brüssel görüşlərində əldə edilən razılaşmalara əməl etməməkdə ittiham edən erməni Baş nazir Münxen Təhlükəsizlik Konfransında Azərbaycan və Ermənistanın bu görüşlərin məzmununa sadiq olduğunu bildirib. Dolayısı ilə nataraz mövqeyini bir daha nümayiş etdirib.

Ermənistan rəhbərliyinin ikibaşlı siyasət həyata keçirdiyi, gah sülhdən danışıb, gah da əksinə addım atdığı ilk olmadığı kimi, bu addımların arxasında məkrli planların dayandığı da heç kimə sirr deyil. Yəni rəsmi İrəvanın zamana və proseslərin gedişinə uyğun olaraq siyasi mövqeyini dəyişdiyinin dəfələrlə şahidi olmuşuq. Halbuki sülhdən boyun qaçırmaq üçün Ermənista¬nın əlində heç bir bəhanə qalmayıb.

Görünən odur ki, Ermənistan hakimiyyəti sülh və əmin-amanlıqdan danışsa da, revanşist ritorikadan da əl çəkmək istəmir. Azərbaycan isə bundan fərqli olaraq bölgədə sabitliyin bərqərar olmasında maraqlıdır. Ermənistan da eyni mövqedədirsə, bunu sözdə deyil, əməli ilə də sübut etməlidir.