Paşinyan təcili iclas çağırdı | İclasın təfərrüatları açıqlandı

Ermənistanın Baş naziri Nikol Paşinyan martın 7-də parlamentdə mətbuata qapalı toplantı keçirib.

İclasda hökumət üzvləri, o cümlədən Baş nazirin müavinləri Mher Qriqoryan, Tiqran Xaçatryan və Təhlükəsizlik Şurasının katibi Armen Qriqoryan da iştirak edib.

Ermənistan mediasının məlumatına görə, Baş nazir görüşdə Azərbaycana ilkin mərhələdə verilməsi tələb olunan 4 kənd barədə danışıb. N.Paşinyan söhbətin Bağanis Ayrum, Aşağı Əskipara, Xeyrimli və Qızıl Hacılı kəndlərindən getdiyini vurğulayıb.

Məqalədə həmçinin qeyd olunub ki, Ermənistan bu kəndləri işğal etdikdən sonra onları Tavuş rayonunun inzibati ərazi vahidinə daxil edib. Tavuş qubernatoru Ayk Qalumyan da toplantı zamanı rayonun ərazisində azərbaycanlı kəndlərinin olduğunu təsdiqləyib.

Hökumətyönlü mənbələrdən “Hraparak”a bildirilib ki, adıçəkilən 4 kəndin coğrafi mövqeyi onların təslim edilməsinin Ermənistan üçün problem yaratmayacağını deməyə əsas verir.

“Azərbaycan tərəfi əvvəlcə problemsiz əraziləri tələb edir, Ermənistan cəmiyyəti buna öyrəşəndən sonra qalan kəndlər də təslim ediləcək. Yəni N.Paşinyan vaxtaşırı ictimaiyyəti müharibə ilə qorxutmaqla mərhələli təslim proqramı həyata keçirir”, – deyə məqalədə qeyd edilib.

Xatırladaq ki, hazırda Qazax rayonunun Sofulu, Bərxudarlı, Bağanis Ayrum, Qızıl Hacılı, Yuxarı Əskipara, Aşağı Əskipara və Xeyrimli, eləcə də Naxçıvanın Kərki kəndi erməni işğalı altındadır.