Paşinyan Türkiyə ilə sərhədlərin açılmasından, Bakı ilə sülh şərtlərindən danışdı

Azərbaycanla sülh müqaviləsinin bəzi müddəaları razılaşdırılıb.

Bu barədə Ermənistanın Baş naziri Nikol Paşinyan çıxışında bildirib.

“Azərbaycanla sülhün 3 fundamental prinsipi razılaşdırılıb və Tərəflər həmin razılaşdırılmış prinsiplərə sadiq qalarsa, sülh və münasibətlərin normallaşdırılması sazişinin imzalanması reallaşar”, – deyə o söyləyib.

Baş nazir qeyd edib ki, plana Türkiyə ilə münasibətlərin tənzimlənməsi də daxildir: “Ümidvaram ki, yaxın gələcəkdə biz xüsusi nümayəndələrin müzakirələri və danışıqları nəticəsində əldə olunmuş razılıqların həyata keçirilməsinə nail olacağıq. Bu mərhələdə Ermənistan-Türkiyə sərhədi 3-cü ölkə vətəndaşları və diplomatik pasport sahibləri üçün açılar. Siyasi razılaşma ilə yanaşı, mühüm infrastruktur işləri də görülüb, xüsusən də biz Marqara keçid məntəqəsində işləmişik və artıq açılışa hazırıq”.

Paşinyan əlavə edib ki, son iki ildə beynəlxalq vəziyyət xeyli pisləşib. Nüvə müharibəsi ehtimalından danışan erməni Baş nazir bu vəziyyətin ölkəsi üçün ciddi təhlükələr yaratdığını qeyd edib.