Paşinyandan Azərbaycan və Türkiyə ilə bağlı açıqlama

“Ermənistanın xarici siyasətinin əsas məqsədi bütün qonşularla normal münasibətlərin qurulması olmalıdır”.

Bu sözləri Ermənistanın Baş naziri Nikol Paşinyan Çexiyanın “Respekt” jurnalına müsahibəsində deyib. N.Paşinyan bunu Ermənistan üçün həyati vacib məsələ adlandırıb.

“Biz bəzi qonşularımızla normal münasibət qurmamağı öyrənmişik. Bu vəziyyəti dəyişmək ölkəmiz üçün həyati əhəmiyyət kəsb edir. Bu, çox sadə görünür, lakin onun həyata keçirilməsi onlarla problemlə bağlıdır. Bəzi psixoloji və praktik problemlər var. Belə bir mesajın Ermənistan cəmiyyəti üçün həzm edilməsi asan deyil”, – deyə N.Paşinyan bildirib.

Ermənistanın Baş naziri əlavə edib ki, ölkəsinin Gürcüstan və İranla yaxşı münasibətləri var və onlar inkişaf etdirilməli, təkmilləşdirilməlidir. “İndi Ermənistanın Türkiyə və Azərbaycanla demək olar ki, heç bir əlaqəsi yoxdur və bunu dəyişdirmək lazımdır”, – deyə N.Paşinyan vurğulayıb.