Paşinyandan Azərbaycana təklif | 2 variant var

"Azərbaycanla sərhədin delimitasiyası üçün iki variant var: onu ya bütün sərhəd boyunca, ya da hissələrə ayırmaqla aparmaq”.

Bu sözləri Ermənistanın Baş naziri Nikol Paşinyan fevralın 15-də keçirdiyi hökumət iclasında deyib.

Bildirib ki, sərhədlərin bərpası məsələsində ölkəsi konstruktiv mövqe nümayiş etdirir:

“2022-ci ildə razılıq əldə olunub ki, sərhədlərin delimitasiyası komissiyalarının vəzifələrinə sərhəd təhlükəsizliyi məsələləri də daxil edilsin. Ermənistan sərhədlərin delimitasiyası və təhlükəsizlik məsələləri üzrə komissiya yaradıb. İrəvan sərhədlər razılaşdırıldıqdan sonra qoşunların sərhəd xəttindən qarşılıqlı şəkildə çıxarılmasına hazırdır. Biz konstruktiv yanaşma nümayiş etdirərək Azərbaycanla sərhədin yerdə müəyyənləşdirilməsini və qoşunların çıxarılmasının həyata keçirilməsini təklif etmişik.

İkinci variant odur ki, biz sərhədi parçalara ayırırıq və hissə-hissə irəliləyirik. Hətta razılaşırıq ki, bölgə-bölgə demarkasiya aparılsın, hər bir bölgədə sərhədi təkrar müəyyən edək, sonra isə anklav məsələsini son mərhələyə buraxaraq qoşunların yerləşdiyi yerləri dəqiqləşdirək".

Baş nazir çıxışında onu da vurğulayıb ki, Ermənistan bütün qonşu dövlətlərin ərazi bütövlüyünü tanıyır və öz sərhədlərindən kənarda heç bir niyyəti yoxdur.