Paşinyandan delimitasiya barədə təcili açıqlama | O ərazidə iddiamız yoxdur

“İrəvan və Bakı sərhədlərin delimitasiyası ilə bağlı praktiki prosesə başlayıb ki, bu da çox vacibdir”.

Bunu Ermənistanın Baş naziri Nikol Paşinyan Britaniya mətbuatına müsahibəsində deyib. Bildirib ki, 29 743 kv.km ərazidən kənarda ölkəsinin heç bir istiqamətdə heç bir iddiası yoxdur.

Onun sözlərinə görə, hökumət suverenliyini, müstəqilliyini məhz bu əsasda qurmalı və inkişaf etdirməlidir.

“Biz Ermənistanla Azərbaycan arasında sərhədin delimitasiyası üzrə praktiki prosesə başlamışıq ki, bu da təhlükəsizlik risklərinin azaldılması da daxil olmaqla inanılmaz dərəcədə vacibdir. Ermənistanla Azərbaycan arasında SSRİ-nin dağılması zamanı mövcud olan sərhədləri yenidən bərpa etmək lazımdır. Yeni sərhədlər çəkməyə ehtiyac yoxdur, SSRİ-nin dağılması zamanı mövcud olan sərhədləri xəritə üzərində bərpa etsək, bəs edir”.

N.Paşinyan həmçinin qeyd edib ki, Ermənistan və Azərbaycan arasında sülhün 3 fundamental prinsipi qeydə alınıb: “Birincisi, Ermənistan və Azərbaycanın 1991-ci il Alma-Ata Bəyannaməsi əsasında bir-birinin ərazi bütövlüyü və suverenliyini tanıması, ikincisi, hər iki ölkənin Alma-Ata Bəyannaməsini delimitasiya prosesində siyasi əsas kimi qəbul etməsi, üçüncüsü, regional kommunikasiyaların ölkələrin suverenliyi və yurisdiksiyası altında, qarşılıqlılıq və bərabərlik prinsipləri əsasında açılması”.

Hökumət rəhbəri müsahibəsində onu da bildirib ki, bundan əvvəl İrəvan və Bakı 1991-ci il Alma-Ata Bəyannaməsinə uyğun olaraq sərhədlərin delimitasiyası ilə bağlı razılaşıblar. Bundan əlavə, tərəflər təmas xətti boyunca öz sərhəd xidmətlərinin eyni vaxtda və paralel yerləşdirilməsi barədə də razılığa gələcəklər.

Onun sözlərinə görə, proseslər tam başa çatana qədər sərhədlər delimitasiya olunmuş hesab olunacaq.