Paşinyandan ermənilərə təcili xəbərdarlıq | Müharibənin necə bitəcəyini bilirəm

“İrəvan sərhədlərin delimitasiya və demarkasiyası məsələlərini Bakı ilə müzakirə etməkdən imtina edərsə, bu, müharibəyə gətirib çıxaracaq”.

Bu barədə Ermənistanın Baş naziri Nikol Paşinyan Tavuş bölgəsinə səfəri zamanı ermənilərlə görüşündə danışıb.

“Mən indi ayağa qalxıb zalı tərk edə bilərəm və deyərəm ki, delimitasiya ilə demarkasiya olmayacaq. Lakin bu o deməkdir ki, həftənin sonunda müharibə olacaq. Müharibə baş versə, nə ilə nəticələnəcəyini də bilirəm. Sonra biz Respublika meydanında qarşılaşanda siz mənə deyəcəksiniz ki, yaxşı, deyək ki, biz sadə kəndlilərik, məlumatımız yox idi, amma siz axı hər şeyi bilirdiniz”, – o bildirib.

Baş nazir onu da qeyd edib ki, Ermənistanla Azərbaycan arasında sərhədin demarkasiyası və delimitasiyası prosesi artıq praktiki mərhələyə keçib. Paşinyanın sözlərinə görə, hökumətin məqsədi müharibənin qarşısını almaqdır.