Paşinyandan kritik açıqlama: Ermənistan sərhədləri açmağa hazırlaşır?

“Yaxın vaxtlarda Azərbaycanla sülh sazişinin imzalanması realdır”.

Bunu Ermənistanın Baş naziri Nikol Paşinyan dənizə çıxışı olmayan inkişaf etməkdə olan ölkələrin nazirlərinin görüşündə deyib.

Onun sözlərinə görə, rəsmi İrəvan regionda kommunikasiyaların açılması üçün effektiv və konkret addımlar atmağa hazırdır:

“30 ildən artıqdır ki, Ermənistanın Türkiyə və Azərbaycanla sərhədləri bağlıdır və bu gün biz regionda nəqliyyat kommunikasiyalarının açılmasının mümkünlüyü barədə çox danışır və müzakirə edirik. Ermənistan Azərbaycanla nəinki keçmişdə mövcud olan dəmir yolu rabitəsini bərpa etməyə, həm də yenilərini inşa etməyə hazırdır. Xüsusilə, söhbət şimal istiqamətindən, yəni Qazaxı Ermənistanın Tavuş rayonu ilə və Azərbaycanın qərb hissəsi ilə Naxçıvanı birləşdirəcək marşrutdan gedir. Bu rabitəni şimal istiqaməti ilə də təmin etmək olar. Biz Türkiyə ilə dəmir yolları və avtomobil yollarının açılmasına eyni hazırlığı nümayiş etdiririk".

Paşinyanın sözlərinə görə, İrəvanın nəqliyyat kommunikasiyalarının açılmasına yanaşmaları “Sülhün qovşağı” konsepsiyasında öz əksini tapıb.

Əlavə edib ki, dekabrın 13-ü baş tutan əsirlərin mübadiləsini “sıfır nöqtəsi” kimi hesab etmək olar.