Paşinyandan Şuşa ilə bağlı etiraf

“Şuşanın itirilməsi 2020-ci il 10 noyabr bəyanatının imzalanmasının əsas səbəblərindən biri oldu”.

Bunu Ermənistanın Baş naziri Nikol Paşinyan parlamentin 44 günlük müharibənin araşdırılması üzrə komissiyasının iclasında bildirib.

O, üçtərəfli bəyanatı imzalamasından da danışıb. “Mən üçtərəfli bəyanatı niyə məhz noyabrın 9-da imzaladım? Əlbəttə, burada dönüş nöqtəsi Şuşanın Azərbaycanın nəzarətinə keçməsi idi. Çünki şəhərin təkcə simvolik deyil, həm də strateji əhəmiyyəti var idi” deyən Nikol Paşinyan Azərbaycan Ordusunun Şuşanı azad etməsi ilə Xankəndinin zərbə altında qala biləcəyini xatırladıb.

“Həmçinin Xocavəndə təzyiqlər artacaqdı. Ən əsası isə 25 minə yaxın əsgər mühasirədə qala bilərdi”, – deyə Baş nazir bildirib.

O qeyd edib ki, noyabrın 9-da müharibəni dayandırmaq üçün 5-ci cəhd edilib. N.Paşinyanın sözlərinə görə, birinci cəhdi oktyabrın 7-də Rusiya Prezidenti Vladimir Putinin ad günündə edib. O, Şuşanı saxlamağa cəhd etdiklərini, lakin bunun mümkün olmadığını deyib.

Ermənistan Baş nazirinin sözlərinə görə, oktyabrın 19-da Rusiya Prezidenti Vladimir Putin ona Azərbaycan tərəfinin yeni tələbi – onların hesablamalarına görə, 90 faizi azərbaycanlı olan şəhərin əhalisinin geri qaytarılmasına zəmanət verilməsi barədə məlumat verib.

“Noyabrın 9-da səhər sənədi imzalayanda məlum oldu ki, Azərbaycan imzalamayıb və yeni şərtlər irəli sürüb”, – deyən N.Paşinyan qeyd edib ki, rəsmi Bakı Qazax rayonunun erməni işğalında olan Azərbaycan kəndlərinin qaytarılmasını tələb edib. Bu tələbi N.Paşinyana Rusiya Prezidenti çatdırıb.