Paşinyanın bu hərəkəti erməniləri təşvişə saldı | Narahatlıq yaradan səbəb

Ermənistanın Baş naziri Nikol Paşinyan Azərbaycanla sərhəddə yerləşən Ararat vilayətinə səfər edib.

Bu barədə erməni mediası məlumat yayıb.

Nəşr yazır ki, Baş nazir səfəri zamanı vilayətin bir çox icmasına baş çəksə də, Kərkidən yan keçib. O hətta kəndə bitişik Sevakavana getsə də, Kərkiyə daxil olmayıb.

Məlumata görə, bu məsələ hakim “Mülki Müqavilə” Partiyası daxilində narahatlıq yaradıb və Kərkinin Azərbaycana veriləcəyi ilə bağlı iddiaların güclənməsinə səbəb olub.

N.Paşinyan vilayətə səfərində müxtəlif icmaların rəhbərlikləri və güc strukturlarının nümayəndələri ilə görüşüb, onlara hədiyyələr verib.

Nəşr iddia edir ki, Baş nazir xüsusilə güc strukturlarına hədiyyə verdiyi hissələrin tam lentə alınması və mətbuatda yayımlanması göstərişini verib.

Belə ki, sözügedən ərazidə onların bir qisminin hakim partiya ilə əlaqəsinin olmadığı bildirilir. Müəllifin iddiasına görə, Baş nazir bununla həmin şəxslərin də öz idarəsi altında fəaliyyət göstərməsinə çalışır.