Paşinyanın ikitərəfli görüşlə bağlı qərarına Hikmət Hacıyevdən reaksiya

“Ermənistanın Baş naziri Nikol Paşinyanın Londonda ikitərəfli görüşdən imtina etməsini sülh gündəliyindən geri çəkilmək kimi qiymətləndiririk”.

Bunu Prezidentin köməkçisi Hikmət Hacıyev “Report”un sualını cavablandırarkən deyib.

Onun sözlərinə görə, Avropa Siyasi Birliyinə ev sahibliyi edən Böyük Britaniya belə bir görüşün keçirilməsi təklifi ilə çıxış edib və bunun Münxen Təhlükəsizlik Konfransında Azərbaycan Prezidenti və Ermənistanın Baş naziri arasında keçirilmiş görüş formatında olması təklif edilirdi.

Belə ki, Münxen Təhlükəsizlik Konfransında da Almaniyanın Kansleri Olaf Şolts görüşün əvvəlində iştirak edib və sonra görüş ikitərəfli formatda Azərbaycan və Ermənistan arasında davam edib.

H.Hacıyev bildirib ki, görüşün əvvəlində Böyük Britaniya Baş nazirinin iştirakı, sonra isə Azərbaycan və Ermənistan liderləri arasında davam etməsi nəzərdə tutulurdu. Amma Ermənistan tərəfi bundan imtina etdi:

“Nikol Paşinyanın bu görüşdən imtina etməsini biz onun dialoqdan və sülh gündəliyinin irəli aparılmasından geri çəkilmək niyyətinin təzahürü kimi qiymətləndiririk.

Müxtəlif platformalarda Ermənistan sülh haqqında danışdığı halda sülh gündəliyinin irəli aparılmasına xidmət edən görüşdən imtina etməsi heç bir halda başadüşülən deyil və beynəlxalq ictimaiyyət özü bunu dəyərləndirməlidir ki, Ermənistan, əslində, dialoq imkanlarını qiymətləndirməli, irəli aparmaq əvəzinə bundan imtina edir”, – deyə Azərbaycan Prezidentinin köməkçisi Hikmət Hacıyev bildirib.