Pentaqon Azərbaycan Ordusunun bu taktikasını öyrənir

ABŞ-nin “Scientific American” jurnalı Pentaqonun Qarabağdakı müharibə təcrübəsini öyrənərək PUA-ları təkmilləşdirdiyini yazıb.

Məqalədə Pentaqonun Azərbaycanın Qarabağda apardığı 44 günlük müharibə təcrübəsindən PUA-ların sürü hücumlarına qarşı effektiv silahlar hazırlamaq üçün əsas kimi istifadə etdiyi bildirilib. Qeyd edilib ki, gələcək müharibələrdə “arı sürüsü” üsulu ilə PUA hücumu qələbənin açarı ola bilər.

Araşdırmada eyni zamanda oktyabrın 7-də HƏMAS yaraqlılarının genişmiqyaslı hücum zamanı İsrail radarlarını çaş-baş salmaq üçün məhz bu taktikaya əməl etdiyi bildirilib.

“Qəfil hücumun ilk saatlarında HƏMAS İsrailin müşahidə qüllələrinə və müşahidə kameralarına PUA-larla koordinasiyalı zərbələr endirdi. Bu hücumlar İsrail Ordusunun Qəzza zolağında müşahidə qabiliyyətini korlamaq, beləliklə də silahlıların ölkə ərazisinə girməsi üçün yol açmaq məqsədi daşıyırdı”, – məqalədə qeyd olunub.