Prezident ASOSAI və ARABOSAI-nın Bakıdakı birgə toplantısının iştirakçılarına müraciət etdi

Prezident İlham Əliyev Bakıda keçirilən Asiya Ali Audit Orqanları Təşkilatı ilə Ərəb Ali Audit Orqanları Təşkilatının birgə toplantısının iştirakçılarına müraciət ünvanlayıb.

Dövlət başçısı ali audit orqanlarının dövlət idarəçiliyində şəffaflığın, səmərəliliyin və hesabatlılığın artırılmasındakı rolunu xüsusi vurğulayıb.

Prezident bildirib ki, belə beynəlxalq toplantıların Azərbaycanda təşkili ölkəmizin bu sahədə atdığı addımların və əldə etdiyi uğurların tanınması baxımından mühüm əhəmiyyət daşıyır.

Müraciətdə qeyd olunur ki, dayanıqlı inkişaf, təbii resurslardan səmərəli istifadə və rəqəmsal transformasiya dövründə ali audit orqanlarının fəaliyyəti daha çevik və effektiv olmalıdır.

Prezident süni intellekt texnologiyalarının dövlət idarəçiliyindəki rolu barədə fikirlərini bölüşərək bildirib ki, bu sahənin audit xidmətlərinə inteqrasiyası nəzarət mexanizmlərinin təkmilləşməsinə ciddi töhfə verəcək.

İqlim dəyişiklikləri ilə bağlı çağırışlara cavab, bu sahəyə yönələn vəsaitlərin şəffaf istifadəsi və auditin nəzarət rolu da müraciətdə xüsusi yer alıb. Prezident COP29 konfransının Azərbaycanda keçirilməsini bu mövzulara ölkəmizin verdiyi dəstəyin bariz nümunəsi kimi qiymətləndirib.

Prezident İlham Əliyev əmin olduğunu bildirib ki, toplantı beynəlxalq əməkdaşlığın dərinləşməsinə və audit sistemlərinin inkişafına töhfə verəcək.