Prezident bir sıra şəxsləri qəbul etdi

Fevralın 8-də Prezident İlham Əliyev Müstəqil Dövlətlər Birliyinin Baş katibi Sergey Lebedevi qəbul edib.

Dövlət başçısı Sergey Lebedevə və MDB müşahidə missiyasının bütün üzvlərinə növbədənkənar prezident seçkilərini müşahidə etdiklərinə görə təşəkkürünü bildirib. MDB müşahidə missiyasının Azərbaycanda bu və daha əvvəlki seçkilərdə də müşahidələrdə fəal şəkildə iştirak etdiyini vurğulayıb.

Prezident İlham Əliyev Türk Dövlətləri Təşkilatının Baş katibi Kubanıçbek Ömüralıyevi də qəbul edib.

Kubanıçbek Azərbaycan liderinə Türk Dövlətləri Təşkilatı adından təbriklərini çatdırıb. Təşkilatın geniş müşahidə missiyası ilə növbədənkənar prezident seçkilərini müşahidə etdiklərini, Azərbaycanın müxtəlif bölgələrində, o cümlədən Şuşada, Xankəndidə və digər ərazilərdə olduqlarını, Türk Dövlətləri Təşkilatı ailəsinə daxil olan başqa təsisatlarla əlaqələndirilmiş şəkildə seçki prosesini müşahidə etdiklərini vurğulayıb. Görüşdə bu il Azərbaycanda Türk Dövlətləri Təşkilatının qeyri-rəsmi Zirvə toplantısının keçiriləcəyi qeyd edilib.

Prezident İlham Əliyev fevralın 8-də həmçinin Şanxay Əməkdaşlıq Təşkilatının Baş katibi Can Mini, o cümlədən Türk Dövlətləri Parlament Assambleyasının Baş katibi Mehmet Süreyya Eri və TÜRKPA beynəlxalq seçki müşahidə missiyasının rəhbəri, Türkiyə Böyük Millət Məclisinin üzvü Osman Mesteni qəbul edib.