Prezident İlham Əliyev Xocalıda görülən işlərlə tanış oldu

Prezident İlham Əliyev Xocalı rayonunun Təzəbinə kəndində aparılan yenidənqurma və bərpa işləri ilə tanış olub.

Dövlət başçısı əvvəlcə kəndə köçən Məhəmməd Fərəcovun evinə baş çəkib. Xankəndi şəhərində, Ağdərə və Xocalı rayonlarında Prezidentin xüsusi nümayəndəsi Elçin Yusubov dövlət başçısına görülən və həyata keçiriləcək işlər barədə məlumat verib.

Bildirib ki, 2025-ci ilin sonunadək kənddə ümumilikdə 197 fərdi ev tikiləcək, növbəti il isə daha 159 evin inşası yekunlaşacaq. Artıq kəndə 28 ailə – 125 nəfər qayıdıb. Eyni zamanda müasir infrastruktur qurulur. 15 kilometrdən artıq elektrik və qaz xətləri çəkilib, su anbarı, rabitə şəbəkəsi, asfalt yollar və istirahət parkı salınıb. Məktəb, ambulatoriya və market binasında təmir işləri aparılır.

Daha sonra Prezident İlham Əliyev Xocalının Daşbulaq kəndində inşa olunmuş yeni kərpic zavodunun açılışında iştirak edib. 8,5 milyon manatlıq layihə çərçivəsində yaradılan zavodda 60 nəfər daimi işlə təmin olunub. Gələcəkdə bu sayın ikiqat artırılması planlaşdırılır.

İllik 16 milyon ədəd kərpic istehsal etmək gücünə malik müəssisədə müasir alman və Türkiyə texnologiyaları tətbiq olunur. Zavod həm iqtisadi inkişaf, həm də məşğulluğun artırılması baxımından işğaldan azad olunmuş ərazilər üçün mühüm əhəmiyyət kəsb edir.

Prezident daha sonra Xocalının Xanyurdu kəndinə gedib. Dövlət başçısı kəndə köçən sakinlər – Rasim Cavadov və Kərəm Abbasovun evlərində olub.