Prezident Xankəndi Dövlət Dram Teatrının binasında görüləcək işlərlə tanış oldu

Prezident İlham Əliyev sentyabrın 19-da Xankəndi Dövlət Dram Teatrının binasına baxış keçirib.

Dövlət başçısına görüləcək işlər barədə məlumat verilib.

Bildirilib ki, 1932-ci ildə Azərbaycan Hökuməti tərəfindən tikilib istifadəyə verilən binanın 1949-cu ildə konstruksiyasına müəyyən əlavələr edilib. Bina sovet dövrü memarlığının əsas elementlərini özündə əks etdirir.

Teatrın binası XX əsr abidəsi kimi Azərbaycan Respublikası Nazirlər Kabinetinin 2 avqust 2001-ci il tarixli 132 nömrəli Qərarı ilə “Yerli əhəmiyyətli daşınmaz tarix və mədəniyyət abidələrinin siyahısı”na daxil edilib.

Mədəniyyət Nazirliyinin və digər qurumların mütəxəssisləri tərəfindən 2023-cü ilin 29 noyabr tarixində Xankəndi şəhərində yerləşən mədəniyyət müəssisələrinin monitorinqi aparılan zaman teatrın binasına da baxış keçirilib. Məlum olub ki, işğal dövründə bina istismar üçün yararsız vəziyyətə salınıb, tikilinin əsaslı təmirə ehtiyacı var.