Prezident yaradılan şəraitlə tanış oldu | Laçındakı yeni SES-lər barədə məlumat

Prezident İlham Əliyev mayın 27-də Laçında “AzərEnerji” Açıq Səhmdar Cəmiyyətinin “Aşağı Malıbəyli” və “Mirik” su elektrik stansiyalarının açılışında iştirak edib.

“AzərEnerji” ASC-nin sədri Baba Rzayev dövlət başçısına su elektrik stansiyaları haqqında məlumat verib.

Bildirilib ki, hər iki stansiya Həkəri çayının sağ qolu olan Zabux çayının Laçın rayonunun Malıbəyli və Mirik kəndlərinin ərazisindən keçən hissəsində inşa edilib.

3,1 MVt gücündə “Aşağı Malıbəyli” və 3,5 MVt gücündə “Mirik” su elektrik stansiyalarında ən müasir avadanlıq quraşdırılıb, optik kabel xətləri çəkilib. Bununla da stansiyalar ölkənin enerji sisteminin mərkəzləşmiş SCADA sisteminə inteqrasiya olunub.

İl ərzində 20 milyon kilovat-saat yaşıl enerjinin istehsalı nəzərdə tutulub ki, bu da öz növbəsində 4,3 milyon kubmetr təbii qaza qənaət etməyə şərait yaradacaq, il ərzində 8 min ton karbon qazının atmosferə atılmasının qarşısını alacaq.

Qeyd olunub ki, yeni istismara verilən stansiyalarda Laçın rayonunun sakinləri çalışacaqlar.

Sonra Prezident İlham Əliyev “Aşağı Malıbəyli” və “Mirik” su elektrik stansiyalarını işə salıb.