Qalstanyanın aksiyasının son mərhələsi | Keşişin kitabı bağlanır

Arxiyepiskop Baqrat Qalstanyan “Vətən naminə Tavuş” hərəkatının son mərhələsinə başlanıldığını bəyan edib və istefa üçün hökumətə 96 saat vaxt verdiyini açıqlayıb.

Baqratın istənilən nəticəni verməyən etirazları və aksiyanın məhz bu baxımdan bu qədər uzanması, əslində, keşişin fiaskoya uğradığını göstərir.

Üstəlik, aksiyalar başlayan gündən Baqratın buna bənzər açıqlamalar verməsi və buna rəğmən, onun tərəfdarlarının sayının günbəgün azalması B.Qalstanyanın kitabının bağlandığını deməyə əsas verir. Lakin sözügedən hərəkata az da olsa, həm daxildən, həm də xaricdən verilən dəstək arxiyepiskopun hələ də ümidinin qalmasına səbəb olur ki, bu da son nəticə ilə bağlı sualları aktual saxlayır.

Başlarına gələn hadisələrdən nəticə çıxarmağa çalışan erməni xalqı artıq revanşistlərin və avantüristlərin arxasınca getmək istəmir, sülh və normallaşma prosesinə vurulan istənilən zərbənin ilk növbədə onların özlərinə zərər verdiyini dərk etməyə çalışırlar. Çünki mövcud problemlər Ermənistanda daxili auditoriya arasında yaranan uçurumu artıq daha da dərinləşdirib, hökm sürən böhran və xaosu inkişaf etdirib.

Görünən odur ki, Baqrat Qalstanyan öz siyasi oyunbazlığı naminə xalqın qanını axıtmağı qarşısına məqsəd qoyub. Bununla da ona qalmayan hakimiyyətin ən azından N.Paşinyan üçün də başağrısı olmasını istəyir. Bu isə kilsənin hələ də mənfur niyyətindən əl çəkmədiyini, faşizm mövqeyini davam etdirdiyini göstərir.