Qarabağdan köçən ermənilərdən hökumətə etiraz

75 yaşlı erməni qadın Güzel Mosiyan 2023-cü ilin sentyabrında Azərbaycanın Xocalı şəhərindən könüllü olaraq Ermənistana köçüb.

G.Mosiyan ermənidilli “Youtube” kanalına müsahibəsində Qarabağı hansı şəraitdə tərk etdikləri və Azərbaycan hərbçilərinin onlara münasibəti barədə danışıb.

Qadın xüsusilə vurğulayıb ki, azərbaycanlılar Xocalıdakı erməni əhaliyə radio vasitəsilə elə erməni dilində müraciət edərək orada qalmağı təklif ediblər:

“Təklif etdilər ki, heç yerə getməyək, bizimlə yaxşı davranacaqlar, vətəndaşlıq alacağıq və azərbaycanlılarla eyni hüquq və imtiyazlara malik olacağıq. Amma biz qorxduq, evdə olan bütün hərbi geyimləri, qohumlarımızın hərbi geyimdə olduqları bütün şəkillərini yandırdıq.

Mənim iki oğlum Birinci Qarabağ müharibəsində ölüb. Sonra avtobuslar gəldi və insanları aparmağa başladı. Nəvəm zəng edib getmək vaxtı çatdığını dedi. Gəlinim evi yandırmaq istədi, amma ərim icazə vermədi”.

Güzel Mosiyan Ermənistanda onlara göstərilən münasibətdən, qarşılaşdıqları şəraitdən isə şikayət edib:

“Ermənistanın özündə Qarabağdan gələn ermənilər heç də xoş qarşılanmırlar. Onların vicdanı olmalıdır. Bizə yorğan, ərzaq lazımdır. Amma çətin ki, Ermənistanda bunların hamısını bizə versinlər. Yaxşı, heç olmasa, mənə yorğan, yemək verin ki, sağ qalaq. Soyuqdur, odun yoxdur. Gecələr şaxta olur, su yoxdur. Ev sahibi deyir ki, su üçün 75 min dram ödəməlisən. O qədər pulu verə bilmərəm, haradan tapım? Suyu qonşulardan gətiririk. Bu bina köhnədir, burada uzun müddət heç kim yaşamadığı üçün hər şey dağıdılıb”.

Qeyd edək ki, erməniəsilli insanların Azərbaycan vətəndaşlığının qəbulunu asanlaşdırmaq üçün xüsusi dövlət proqramına start verilib. Lakin təxribatçı separatçıların sözlərinə uyan bir çox erməniəsilli Qarabağ sakinləri evlərini tərk ediblər.

Nəticədə isə elə erməni qadının dediyi kimi, Ermənistan sakinləri tərəfindən rədd edilir, hüquqları pozulur, ayrı-seçkilik ilə üz-üzə qalırlar.