Qazaxıstanda Regional Ekoloji Sammit fəaliyyətə başlayıb - Baku TV

Aprelin 22-də Astanada Regional Ekoloji Sammit işinə başlayıb.

Sammitin plenar iclasında çıxış edən Baş nazir Əli Əsədov vurğulayıb ki, Azərbaycan ətraf mühitin mühafizəsinə və iqlim dəyişikliyinə qarşı tədbirlərə böyük əhəmiyyət verir, onları milli və beynəlxalq davamlı inkişaf gündəliyinin ayrılmaz hissəsi kimi qiymətləndirir.

Çıxışda bildirilib ki, iqlim dəyişikliyinin, şirin su çatışmazlığının artmasının və su ehtiyatlarına olan təzyiqin güclənməsi fonunda artan qlobal çağırışlar şəraitində su təhlükəsizliyi məsələləri beynəlxalq gündəlikdə prioritet əhəmiyyət kəsb edir.

Xəzər dənizində ekoloji vəziyyətlə bağlı problemlərə toxunan Baş nazir vurğulayıb ki, ən kəskin çağırışlardan biri Xəzər dənizinin səviyyəsinin sürətlə azalmasıdır.

O qeyd edib ki, Azərbaycanın bu çağırışla bağlı səmərəli qarşılıqlı fəaliyyətin göstərilməsi üçün Xəzəryanı dövlətlər arasında əməkdaşlığın möhkəmləndirilməsi istiqamətində ardıcıl səylər göstərir.

Həmçinin ətraf mühitin deqradasiyasına ciddi təsir göstərən iqlim faktorlarını plenar iclasın iştirakçılarının diqqətinə çatdıran Əli Əsədov bu çağırışlara cavab verilməsi üzrə Azərbaycanda görülən ardıcıl tədbirlərdən danışıb.

Plenar iclasın iştirakçılarına eyni zamanda Azərbaycanın iyun ayında ev sahibliyi edəcəyi daha bir mühüm tədbirə – 2026-cı il Ümumdünya Ətraf Mühit Gününə hazırlıq barədə məlumat verilib.