Qazaxıstanlı nazir təyyarə qəzasının təfərrüatını açıqladı | Təyyarə sahil xəttinə yönəlib və…

“Hava limanının qəza xidmətləri təyyarəni qəbul etməyə hazır idi. Ekipaj Qazaxıstanın hava məkanına daxil olduqdan sonra Aktau şəhərinin qüllə dispetçeri ilə əlaqə yaradıb. Dispetçer təyyarənin aerodroma enməsi üçün bütün lazımi tədbirləri operativ şəkildə həyata keçirib”.

Bunu Qazaxıstanın nəqliyyat naziri Marat Karabayev deyib.

“Uçuş-enmə zolağı ilə vizual əlaqənin qurulmasını asanlaşdırmaq üçün zolağın işıqları yandırılıb. Ekipaj Aktau aerodromunun uçuş-enmə zolağına daxil olmağa iki dəfə cəhd edib və bu zaman təyyarənin hündürlüyündə xaotik dəyişikliklər müşahidə olunub. Təyyarə sahil xəttinə doğru yönəlib. Saat 11:28-də ekipajla əlaqə itib və təyyarə yerə çırpılıb.

Aktau hava limanının xilasetmə xidməti dərhal hadisə yerinə gəlib və sərnişinlərin təxliyəsinə başlayıb. Qazaxıstan Nəqliyyat Nazirliyinin Nəqliyyatda İnsidentlərin və Hadisələrin Araşdırılması Departamentinin mütəxəssislərindən ibarət xüsusi Komissiya tərəfindən araşdırma aparılır”, – deyə nazir bildirib.