Qərb Cənubi Qafqazı geosiyasi qarşıdurma meydanına çevirməyə çalışır

“Fransa dünyanın digər yerlərində bərbad olan siyasi reputasiyasını Cənubi Qafqazda dirçəltməyə çalışır”.

Bunu Rusiya Xarici İşlər Nazirliyinin sözçüsü Mariya Zaxarova brifinq zamanı bildirib.

Zaxarova jurnalistin “Azərbaycan Prezidenti İlham Əliyev Fransanın Cənubi Qafqazda müharibə üçün zəmin hazırladığını bəyan edib. Moskva belə bir risk görür?” sualına cavab olaraq deyib:

“Fransanın hərəkətlərinə Bakının sərt qiymət verməsi bizi heç də təəccübləndirmir. Düşünürəm ki, Bakıda və bir sıra digər yerlərdə Cənubi Qafqazda siyasi reputasiyasını bərpa etməyə uğursuz cəhdlər edən Parisin müdaxiləsindən beziblər. Halbuki Fransanın reputasiyası dünyanın digər yerlərində və qitələrində olduqca bərbad vəziyyətdədir.

Cənubi Qafqazda təxribat riskləri qalmaqdadır. Bu baxımdan, Rusiya Cənubi Qafqazın bütün region dövlətləri, qonşu ölkələrin maraqlarına əsaslanan sabitlik və firavanlıq zonasına çevrilməsi istiqamətində davamlı olaraq çalışır. Bu məntiqlə biz Cənubi Qafqaz üzrə “3+3” regional məsləhətçi platforması çərçivəsində qarşılıqlı əlaqələr qururuq, ən yüksək səviyyədə imzalanmış üçtərəfli sazişlər əsasında Bakı ilə İrəvan arasında münasibətlərin hərtərəfli normallaşdırılması üzərində işləyirik”.

“Biz dəfələrlə demişik ki, Qərb vasitəçilərinin, o cümlədən Fransanın məqsədləri tamam başqadır, onlar Cənubi Qafqazı növbəti geosiyasi qarşıdurma məkanına çevirməyə çalışırlar. Həmin dövlətlər region ölkələrinin köklü maraqlarına məhəl qoymurlar və regionda təhlükəsizliyin, sabitliyin və rifahın təmin olunması üçün heç bir iş görmürlər”, – deyə Zaxarova əlavə edib.