Qərbi Azərbaycan İcması bəyanat yaydı

"Ermənistanda Azərbaycan əsgərinə işgəncə verilməsi görüntülərinin yayılmasından cəmi bir gün sonra bu ölkədə Azərbaycana qarşı növbəti nifrət aktı törədilib”.

Bu fikirlər Qərbi Azərbaycan İcmasının İrəvanda Azərbaycan bayrağının yandırılması ilə bağlı bəyanatında yer alıb. İcmanın sözçüsü Ülviyyə Zülfiqar qeyd edib ki, polis tərəfindən azad edilən həmin şəxs bu ölkənin parlament üzvləri də daxil olmaqla çoxsaylı kütlə tərəfindən qəhrəman kimi qarşılanıb. Bütün bunlar Ermənistanda Azərbaycana qarşı dövlət tərəfindən dəstəklənən və sistemli şəkildə aparılan etnik nifrət siyasətinin və Azərbaycanofobiyanın göstəriciləridir.

İcmadan həmçinin bildirilib ki, Ermənistanın törətmiş olduğu insanlıq əleyhinə cinayətlərə və müharibə cinayətlərinə beynəlxalq aləmin lazımınca reaksiya göstərməməsi bu ölkədə irqi ayrı-seçkilik siyasətinin və cəmiyyətdə ksenofobiya meyillərinin daha da güclənməsinə şərait yaradır.

“İcma Azərbaycan bayrağına qarşı törədilən cinayəti kəskin şəkildə qınayır və Ermənistan hökumətindən azərbaycanlılara qarşı nifrət və ayrı-seçkiliyi aşılayan siyasət və praktikasını dərhal dayandırmağı, azərbaycanlılara qarşı cinayət törətmiş şəxsləri ədalət məhkəməsinə təslim etməyi və onları şöhrətləndirməyə dərhal son verməyi tələb edir”, – deyə o vurğulayıb.

Bəyanatda qeyd olunub ki, bütün bunlar Ermənistana qayıtmağımız üçün müvafiq verifikasiya, hüquqi və təhlükəsizlik zəmanət mexanizmini ehtiva edən razılaşmaların zəruriliyini bir daha vurğulayır.