Qərbi Azərbaycan İcmasının əldə etdiyi uğurlar

“Qərbi Azərbaycan həqiqətlərinin dünya ictimaiyyətinə çatdırılması istiqamətində həm ölkə daxilində, həm də beynəlxalq miqyasda xeyli işlər görə bilmişik”.

Bu sözləri Milli Məclisin deputatı, Qərbi Azərbaycan İcmasının İdarə Heyətinin sədri Əziz Ələkbərli jurnalistlərlə keçirilmiş görüşdə söyləyib.

O qeyd edib ki, ilk dəfə olaraq Qərbi Azərbaycan məsələsi BMT-nin dörd rəsmi sənədi kimi qəbul olunub: “Bu, Qərbi Azərbaycan həqiqətlərinin, yəni son iki yüz ildə tarixi torpaqlarımızda soydaşlarımıza qarşı törədilmiş cinayətlərin beynəlxalq müstəvidə qəbul və etiraf olunması, həmçinin erməni cinayətləri barədə dünya ictimaiyyətinin məlumatlandırılmasıdır. Eyni zamanda bir sənəd AŞPA-nın rəsmi sənədi kimi qəbul olunub. Bu, Azərbaycan diplomatiyasının, xarici siyasətinin çox böyük uğurudur. Bu uğurda təkcə Qərbi Azərbaycan İcmasının yox, mətbuat nümayəndələrinin də böyük xidməti var”.